Eglwys Efengylaidd Caerfyrddin
Y Celwrn, Heol yr Hen Orsaf, Caerfyrddin, SA31 1JN
Dilynwch ni ar twitter: @Y_Fesen
ac ar Facebook: @eglwyscaerfyrddin
Er bod y gair 'eglwys' yn aml yn cael ei ddefnyddio ar gyfer adeilad arbennig, mewn gwirionedd y mae'r gair yn cyfeirio at gymdeithas o bobl. Yn y Testament Newydd mae'n cael ei ddefnyddio i sôn am bobl sy'n dod at ei gilydd am eu bod yn credu yn Iesu Grist fel eu Gwaredwr a'u Harglwydd.
EFENGYLAIDD
Ystyr 'efengyl' yw 'newyddion da'. Pobl y 'newyddion da' am Iesu Grist, felly, yw pobl 'efengylaidd' - pobl sy'n credu bod maddeuant pechodau, perthynas real â Duw, bywyd tragwyddol, ystyr newydd i fywyd, a llu o fendithion eraill i'w cael yn Iesu Grist.
CAERFYRDDIN
Rydym yn falch o gydnabod ein perthynas â Christnogion eraill ledled Cymru a thrwy'r byd. Ond ein dymuniad yw addoli a gwasanaethu'r Arglwydd Iesu Grist yma yng Nghaerfyrddin a'r ardaloedd oddi amgylch, a hynny drwy'r Gymraeg. Rydym yn cyfarfod yn ein hadeilad, 'Y Celwrn', yn Heol yr Hen Orsaf.
HANES
Yn 1989 y ffurfiwyd Eglwys Efengylaidd
Gymraeg Caerfyrddin gyda'r Parch Dafydd Morris yn weinidog arni. Roedd
Eglwys Efengylaidd wedi'i sefydlu yng Nghaerfyrddin yn 1974 a oedd yn
cynnal rhai gwasanaethau Cymraeg ac wrth i'r gwaith gynyddu teimlwyd
mai'r ffordd orau i gyhoeddi'r efengyl i Gymry'r cylch fyddai sefydlu
eglwys Gymraeg annibynnol. Mae'r ddwy eglwys yn dal i ystyried eu hunain
yn chwaer eglwysi ac am 20 mlynedd roeddent yn cyfarfod yn yr un
adeilad. Llwyddodd yr Eglwys Efengylaidd Gymraeg i brynu adeilad yn Heol
yr Hen Orsaf yn 2008, gan addoli yno am y tro cyntaf ddechrau
Gorffennaf 2009. Er mai hanes diweddar yw hwn i gyd rydym hefyd yn
arddel ein perthynas trwy ras â thraddodiad efengylaidd ardderchog tref
Caerfyrddin, tref y ddau David Charles a'r dref lle y cyhoeddwyd
gweithiau mawrion Williams Pantycelyn.
Ar 1 Mawrth 2017 dechreuodd y Parch Roger Thomas ar ei waith fel Efengylydd cyflogedig llawn amser yn yr eglwys, arwydd o'n hymrwymiad i gyhoeddi'r newyddion da am Iesu Grist i Gymry Caerfyrddin a'r cyffiniau, ac o'n hiraeth disgwylgar am i Dduw drugarhau wrthym fel eglwys, bro a chenedl.
ARWEINWYR
Henuriaid: Parry Davies; Robert Rhys
Efengylydd: Parch Roger Thomas
07753 124668
revrogerthomas@yahoo.co.uk
Diaconiaid: Huw Francis (trysorydd); Howie Jones; Gareth Morgan
Croeso i chi ymuno â ni yn ein cyfarfodydd yn 'Y Celwrn', Heol yr Hen Orsaf, ar y Sul neu ar nos Fercher.
